Darood Ibrahimi Islam mein ek khaas maqam rakhta hai, jo Hazrat Muhammad Mustafa ﷺ par bhejna ek azeem ibadat hai. Yeh darood na sirf afzal aur maqbool hai, balkay iske fawaid bhi lajawab hain. Is maqale mein hum Darood Ibrahimi ke azeem fawaid aur ek aise waqiya ka zikr karenge jo iski fazilat ko behtareen tareeqay se samajhne mein madad dega.
Ek Bachchi Aur Darood Sharif ki Barkat
Hazrat Sheikh Muhammad bin Sulaiman Jazuli رحمَهُ اللهُ عَلَيْهِ ek martaba wuzu karne ke liye kunwen par gaye, magar paani nikalne ke liye koi cheez mojood nahi thi. Sheikh kafi pareshan the. Isi beech ek ounchy makan se ek chhoti si bachchi ne dekha aur kaha, “Aap woh Sheikh hain jinke naikiyon ka har jagah churcha hai, lekin aap pareshan hain ke paani kaise nikalein!”
Us bachchi ne kunwen mein apna luab (thook) dala aur dekha ke paani kunwen se upar uth kar zameen par behne laga. Sheikh ne wuzu kiya aur bachchi se poocha, “Tumhein yeh martaba kaise mila?” Bachchi ne jawab diya, “Main Rasool Allah ﷺ par kasrat se darood bhejti hoon.” Yeh sunkar Sheikh ne qasam khaai ke woh Darood o Salam ki fazilat pe ek kitaab likhenge. Is tarah unhon ne “Dalail ul Khairat” nami mashhoor kitaab likhi. (Mutala’ al-Masarat Mutarjam, Safah 33, 34)
Darood Sharif ke Fazail
- Hazrat Abu Bardah bin Niyar رضي الله عنه se marwi hai, “Meri ummat mein se jis ne sadaq-e-dil se aik martaba Durood-e-Pak parha, Allah Kareem us par das rehmatain nazil farmaayega aur us ke liye das nekian likhega aur us ke das darajat buland farmaayega aur us ke das gunaah mita dega.” (Mu’jam Kabir, J22 Safah 195 Hadith: 513)
- Hazrat Abu Umamah رضي الله عنه se marwi hai, “Har Jummah ke din mujh par Durood-e-Pak ki kaisrat kiya karo, be-shak meri ummat ka Durood har Jummah ke din mujh par pesh kiya jata hai, (Qiyamat ke din) logon mein se mere zyada qareeb woh shakhs hoga jis ne (duniya mein) mujh par zyada Durood parha hoga.” (Sunan al-Kubra, J3 Safah 353 Hadith: 5995)
- Rasool Allah ﷺ ne farmaya, “Ae logon! Be-shak tum mein se broz-e-Qiyamat uski deshton aur hisaab kitaab se jald nijaat paane wala woh shakhs hoga jis ne duniya mein mujh par kaisrat se Durood padha hoga.” (Firdous al-Akhbar, J2 Safah 471 Hadith: 8210)
- Nabi-e-Karim ﷺ ka irshad hai, “Mujh par kaisrat se Durood-e-Pak padho, be-shak tumhara mujh par Durood-e-Pak padhna tumhare gunaahon ke liye maghfirat hai.” (Jami’ al-Saghir, Safah 87 Hadith: 1406)
Darood Ibrahimi sirf ibadat nahi, balke ek azeem sawab aur barakat ka zariya hai. Har musalman ko chahiye ke woh kasrat se Darood sharif bheje aur apne aamal mein is ibadat ko shamil kare.